رسالة الشرطه ..آه .. بلطجة الشرطه ..مايحكمشى

اليوم 25 يناير عيد الشرطه وأنا ماشى فى الشارع ومعايا واحد صاحبى سمعنا أصوات فرقعه جامده ولما سألنا قالوا لنا كل سنه وانتوا طيبين النهارده أعياد الشرطه !! أستغربت أى أعياد ؟ وأى شرطه؟ الشرطه اللى بتعتقل الناس وتعذبهم وتهينهم؟ ولا الشرطه اللى بتقتل المتظاهرين بمساواة كامله ما بتفرقش بين الجنسيات .. مصرى ..سودانى ما يهمش مش احنا أعضاء فى الأمم المتحده؟ خلاص يبقى نضرب أو نقتل أى حد عضو معانا فى المنظمه العالميه ..ولا الشرطه اللى قتلت الناخبين اللى عمال التلفزيون يقولهم : أخى المواطن .. أختى المواطنه شارك فى صنع مستقبل بلدك وتوجه الى صناديق الأنتخاب..وراح المواطن والمواطنه وهما مش عارفين انهم ح يروحوا لصناديق الأموات بدل صناديق الأنتخاب

ولا الشرطه اللى بتحمى الباشا الكبير ؟ حتى لو كان ضد ارادة الشعب اللى بيدفع لهم مرتباتهم من جيبه ومن حصيله طوابع الشرطه اللى لازم تحطها على أى طلب حتى لو عايز تسلم ع المأمور وتقوله كل سنه وانت طيب يا باشا ؟

الحقيقه لما صاحبى سألنى عن العلاقه بين الفرقعه اللى سامعينها وبين أعياد الشرطه ؟..قلت له دى علاقه عاديه جدا !!! الشرطه دايما مستعده حتى وهما بيحتفلوا بأعيادهم ومن ضمن الأستعداد انهم يدربوا على ضرب القنابل ...الصديقه طبعا زى النيران الصديقه ..انت دايما نيتك وحشه كده؟ والقنابل الصديقه دى هى القنابل المسيله للدموع واسمها صديقه عشان بتتضرب ع الأصدقاء والمواطنين اللى هما أحنا ولو رحت الأحتفال بتاعهم ح تسمع الموسيقى التصويريه هاه ..هو..هو..هو وده صوت العساكر بتوع الفزع المركزى لما بيفضوا مظاهرة المشاغبين أعداء الوطن اللى هما أحنا ..الشرطه اللى عايزينها ونرفع راسنا فوق لما نحتفل بيها هى الشرطه اللى وقفت مع أهلها الحقيقين وشعبها اللى اتربت وسطهم ضد الأحتلال الأنجليزى ف 25 يناير 1952 أما الشرطه اللى واقفه جنب.. وورا.. وحوالين الحاكم الواحد المستبد ضد شعبها ..فلا تستحق حتى ذكر اسمها ..واذا كان ولا بد نذكر اسمها ...نبقى نقول

أعوذ بالله من الشيطان الرجيم